أحمد نجدي

ووردبريس بنكهة عربية

إيه الفرق بين بلوجر ووردبريس؟ وإيه الخيار الأفضل ليك؟ 

دول أول سؤالين هيجوا في بالك لو لسه مبتدئ أو ناوي تعمل مدونة جديدة، وطبيعي تكون محتار بينهم في بداية رحلتك لعالم التدوين، فلو دا وضعك حاليًا يبقى أنت في المكان المناسب دلوقتي. 

التواجد على الإنترنت بقى شيء أساسي في عالمنا الحالي، وأفضل طرق التواجد دي هي إنشاء موقع إلكتروني، والكتابة والنشر على مدونتك الخاصة.

ومن هنا بتسأل نفسك عن أفضل استضافة، وأفضل منصة لإنشاء الموقع والمدونة، وبيبدأ النقاش حوالين أشهر منصتين وهما، بلوجر ووردبريس. 

وعشان كدا في المقال دا هتكلم عن الفرق بين بلوجر ووردبريس، وأهم المميزات المشتركة بينهم، وهقولك على الأنسب ليك عشان تستخدمه، خصوصًا لو لسه مبتدئ وتايه. 

يعني إيه نظام إدارة المحتوى “CMS”؟ 

قبل ما نتكلم عن الفرق بين بلوجر ووردبريس، فلازم نفهم الأول إنهم عبارة عن أنظمة إدارة محتوى “Content Management System”. 

ودا نظام برمجي بيساعد على إنشاء المواقع الإلكترونية، وصناعة محتواها، وإدارته، وتحريره، ونشره، من غير ما تحتاج لأي خبرة سابقة بالأمور التقنية، ونقدر نقول إن بلوجر ووردبريس هما نظامين مختلفين من أنظمة إدارة المحتوى المشهورة. 

واللي عن طريقهم بقى إنشاء موقع إلكتروني، والتدوين عليه أمر في غاية السهولة، وعلى درجة عالية من الاحترافية.

لكن لكل منصة منهم مميزاتها وعيوبها، وطريقتها الخاصة في إدارة المحتوى، ودا اللي هوضحهولك في السطور اللي جاية. 

ما هي منصة بلوجر – “Blogger“؟

هي منصة استضافة مدونات مجانية، تابعة لشركة “Google” واللي أطلقتها سنة 2000م، ومعروف عنها البساطة والسهولة في الاستخدام، ودا سبب كافي يخليها خيار شائع بين المبتدئين. 

كل اللي محتاجه عشان تدخل لمدونتك، وتبدأ في نشر مقالاتك، هو حساب على Google اللي بتدعمك بالسيرفرات الخاصة، والحماية الكاملة اللي أنت محتاجها، وبيكون عنوان مدونتك شبه كدا:
www.yourname.blogspot.com 

لكن الخبر السيء هنا إن جوجل قللت دعمها لبلوجر مؤخرًا، وعادي جدًا إنها تستغنى عن بلوجر في المستقبل زي ما عملت قبل كدا في جوجل بلس. 

ما هي منصة ووردبريس – “WordPress“؟ 

ووردبريس هو واحد من أفضل وأشهر منصات التدوين مفتوحة المصدر حول العالم، ويمكن الفرق بين بلوجر ووردبريس هنا إن ووردبريس معندهاش نفس الدعم من شركة زي جوجل.

لكن بالرغم من كدا، فبيتضاعف عدد مستخدميها بشكل مستمر من وقت إطلاقها في 2003م لحد النهاردة، وبتستخدمها أكبر الشركات في إدارة موقعها الإلكتروني حالياً، واللي من أشهرهم مدونة مايكروسوفت، وموقع البيت الأبيض، ومؤسسة ناسا.

وبحسب آخر إحصائية نشرها موقع “colorlib” في 1 مارس 2024 عن أكتر أنظمة إدارة المحتوى استخدامًا في العالم، فهنلاقي إن WordPress بيتصدر القائمة بفارق كبير جدًا عن باقي المنافسين، وبيمتلك أكتر من 35 مليون مستخدم، وإن أقرب منافس ليه هو Wix بـ 8.2 مليون مستخدم فقط. 

في حين إن Blogger بيمتلك في حدود 600 ألف مشترك بس، والأرقام دي مش للتقليل من بلوجر أبدًا، بالعكس هو بيقدملك خدمات ومميزات كتير، صعب إنك تلاقيها في منصات تانية بشكل مجاني. 

الفرق بين بلوجر ووردبريس 

من خلال بعض النقاط المهمة اللي هكلمك عنها دلوقت، هيبان لك الفرق بين المنصتين، وإيه سر تفوق ووردبريس الكبير دا في عدد المستخدمين، فخلينا نبدأ من أهم نقطة: 

1- الملكية 

الفرق بين بلوجر ووردبريس في النقطة دي جوهري، لأنك في ووردبريس هتمتلك موقعك بالكامل، عن طريق شراء استضافة واختيار “Domain Name” خاص بيك، وبعدها تركب على موقعك الووردبريس عشان تتحكم في إدارة كل حاجة على الموقع والمدونة. 

لكن طبعًا دي حاجة بتشتريها من شركات الاستضافة وليها تكلفتها، واللي بتبدأ من 4 دولار شهريًا، وبتزيد حسب قدرة الموقع على استقبال عدد زوار أكبر، وحسب استهلاكك لموارد الاستضافة. 

على الناحية التانية بقى هتلاقي إن بلوجر منصة مجانية تمامًا، وتقدر تستخدمها في أي وقت، وتعمل عليها عدد لا نهائي من المدونات، لكن في النهاية جوجل هي اللي بتمتلك المدونة مش أنت، وليها الحق القانوني في حذف مدونتك أو تقييد النشر عليها في أي وقت لو خالفت السياسات بتاعتها. 

دا غير إن في الحالات اللي زي دي بيكون من حق الشركة المالكة إلغاء الخدمة تمامًا في أي وقت تحس فيه إنها بقت غير ضرورية بالنسبالها.

لكن عشان نكون منصفين، في آلاف الآلاف من المدونات اللي شغالة على بلوجر من سنين ومستمرة لحد النهاردة، لأنها مخالفتش أي سياسات تخص بلوجر. 

الخلاصة، لو ما عندكش إمكانية مادية عشان تشتري استضافة، فانسى ووردبريس خالص، واشتغل على بلوجر، لكن لو تقدر توفر كل شهر من 5 لـ 25 دولار على الأقل، يبقى ووردبريس هو الأنسب ليك. 

2- مستوى الحماية 

الفرق بين بلوجر ووردبريس في حماية مدونتك من الاختراق والفيروسات هو إن بلوجر مدعومة من جوجل، وبتستخدم السيرفرات بتاعته لحفظ بياناتك، وطبعًا مش محتاج أقولك إن جوجل واحدة من أقوى الشركات على مستوى العالم، يعني تنسى موضوع الاختراق والفيروسات دا بكل مشاكلهم. 

الووردبريس هو كمان مُحصّن بشكل قوي ضد الاختراق والفيروسات، ودا لإن آلاف المبرمجين المحترفين حوالين العالم شغالين على حمايته وتطويره، ولو حصلت أي مشكلة تخص الحماية هتتحل بأسرع مما تتخيل. 

لكن المشكلة هنا بتظهر بسبب المستخدم نفسه، لإنه مالك المدونة، وعنده كل الصلاحيات الخاصة بيها، فلو كان شخص مبتدئ أو غير واعي للي بيعمله، ممكن يورط مدونته بنفسه في فخ الفيروسات، ويسهّل اختراقها، عشان كدا في ناس كتير شايفة إن ووردبريس للمحترفين. 

3- تحسين الظهور على محركات البحث “SEO” 

طبعًا مش هتكون حابب تصرف فلوس على موقع، وتبذل عليه جهد كبير، وفي الآخر محدش يعرف يوصل له على محركات البحث! وعشان كدا ضروري أفهمك الفرق بين بلوجر ووردبريس في الجزئية دي. 

لو سألتك من وجهة نظرك مين فيهم أفضل؟ غالبًا أول تفكير هيجي في بالك إن بلوجر أفضل في النقطة دي لأنها مدعومة من جوجل، والمفروض إنها متوافقة مع سياساتهم، ودا تفكير منطقي، لكن دعم جوجل مش بيأثر في النقطة دي، بل على العكس هتلاقي إن ووردبريس بيوفر أدوات تساعدك أكتر في الـ SEO. 

أدوات زي Yoast SEO و RankMath بيقدمولك مميزات تساعدك أكتر في تقديم محتوى متوافق مع الـ SEO الخارجي والداخلي للموقع، وبالتالي تظهر مقالاتك بشكل أكبر في الصفحات الأولى من محركات البحث. 

لكن الكلام دا كله مش معناه إن بلوجر سيء في التوافق مع محركات البحث، لأ هو كويس جدًا في النقطة دي، وخليني أقولك إن الموضوع في النهاية هيعتمد بشكل أكبر على مدى جودة المحتوى اللي أنت بتقدمه على مدونتك، والـ Internal Links اللي بتضيفها في كل مقال، بجانب باقي العوامل الضرورية المتعلقة بالـ SEO،  فلو بتعمل النقاط دول بشكل كويس، يبقى مش هتحس بفرق كبير بين الاتنين. 

4- الدعم الفني 

للأسف مفيش دعم فني قوي من جوجل لمدونات بلوجر، وكل اللي هتلاقيه هو منتدى دعم رسمي بيطرح بعض المشاكل والحلول الخاصة بيها، هتدخل تدور عليه على حل مشكلتك، لكن غالباً مش هتلاقيه. 

يعني اختصارًا لوقتك، لو قابلتك مشكلة هتحاول تحلها بنفسك، أو تلجأ لحد متخصص بعيدًا عن الدعم الرسمي بتاع جوجل. 

الفرق بين بلوجر ووردبريس هنا كبير جدًا، لأن نظام ووردبريس عنده دعم فني كامل، وعنده منتدى رسمي خاص بالمنصة، ومنتديات دعم تانية عليها كل المشاكل اللي ممكن تواجهك على ووردبريس بالحلول بتاعتها، دا غير إن شركات الاستضافة هي كمان بتوفرلك دعم إضافي خاص بيها. 

5- سرعة تصفح المدونة 

بنفس طريقة التفكير فمنطقي تظن إن بلوجر هيكون أسرع، لأنه مُثبت على سيرفرات جوجل، وفعلًا سرعة بلوجر ممتازة، لكن ووردبريس هو كمان بيتثبت على سيرفر، فبيكون الفاصل هنا هو إمكانيات السيرفر دا بالمقارنة مع غيره. 

فلو هتثبت ووردبريس على سيرفر إمكانياته عالية، مش هتحس بفرق في سرعة التصفح بينه وبين بلوجر، لكن لو هتلجأ لاستضافة ضعيفة أو مجانية، فلازم هتحس ببطء في سرعة تصفح المدونة عن السرعة اللي هتلاقيها على بلوجر. 

6- النظرة المستقبلية للمدونة 

الفرق بين بلوجر ووردبريس هنا بيشير لتفوق واضح لووردبريس، لأن منصة بلوجر بتوفر لك الأساسيات اللي أنت محتاجها فقط عشان تعمل مدونة جيدة، وبحماية ممتازة، وبشكل مجاني. 

لكن منصة ووردبريس مختلفة تمامًا، لأنها بتوفر لك إمكانيات هائلة بتقدر من خلالها تشكل مدونتك بأي طريقة، وبيكون عندك اختيارات كتير للشكل اللي هتكمل بيه، سواء مدونة، أو موقع، أو منتدى، أو متجر إلكتروني .. إلخ من الأفكار الكتير اللي ممكن تنفذها. 

يعني باختصار، لو الموضوع كله عبارة عن هواية وكل اللي محتاجه مدونة تكتب عليها مقالاتك من وقت للتاني، يبقى بلوجر مناسب ليك وكافي لتحقيق دا، لكن لو بتتعامل معاها على إنها مشروع تحقق منه دخل مستقبلي، يبقى الخيارات اللي بيقدمهالك ووردبرس أفضل بلا شك. 

7- لغة العرض 

عن طريق ووردبريس بتكون قادر على تثبيت المدونة بلغتين أو أكتر، على استضافة واحدة، وبلغة تحكم واحدة، أما بلوجر فهي بتوفرلك إمكانية اختيار لغة عرض مدونتك بحرية، لكن لازم تختار لغة عرض واحدة بس. 

الحكم النهائي 

من كلامنا اللي فات دا كله عن الفرق بين بلوجر ووردبريس هتلاقي إن ووردبريس بيتفوق بشكل واضح على بلوجر، لكن مينفعش أبدًا أقولك تستخدم ووردبريس في كل الحالات بشكل مُطلق، لأن أوقات هيكون استخدام بلوجر أفضل ليك. 

وعشان كدا هوضحلك من وجهة نظري الحالات اللي ممكن تستخدم فيها كل منصة من الاتنين، وهي كالتالي: 

حالات يُفضل فيها استخدام بلوجر 

  • ما عندكش المعرفة الكافية في الأمور التقنية الخاصة بإدارة المدونة، ومعندكش وقت تتعلمها. 
  • مش محتاج مميزات وخصائص كتيرة للتحكم في المدونة، وكل اللي يهمك تنشر المحتوى بس. 
  • مبتدئ وحابب تخوض التجربة المجانية الأول تتعلم عن طريقها، وبعدها تنتقل للووردبريس. 
  • نشرك للمقالات على المدونة هيكون بشكل متقطع، وعلى فترات متباعدة. 
  • ماعندكش استعداد تصرف فلوس على المدونة. 
  • المدونة هتشتغل على مجال واحد بس. 

فهم الفرق بين بلوجر ووردبريس بشكل عميق بيخليك تختار صح إيه الأنسب ليك، ولو أنت مش من ضمن الحالات اللي فاتت يبقى ركز معايا في الجزئية اللي جاية. 

حالات يُفضل فيها استخدام ووردبريس 

  • هتنشئ مدونة شاملة ومتكاملة، ومحتاج إمكانيات وخصائص تحكم كتير. 
  • هتتحكم في المدونة بشكل كامل، وعاوز تحتفظ بملكية كل حاجة عليها. 
  • هتشتغل على المدونة بغرض تجاري، وعندك نية تبيعها في المستقبل. 
  • هتنشر مقالاتك بشكل مستمر، وعندك رؤية مستقبلية عن الموضوع. 
  • هتقدر تدفع التكاليف الشهرية الخاصة بالمدونة. 

دي كانت كل المعلومات اللي أنت محتاجها -من وجهة نظري- عشان تفهم الفرق بين بلوجر ووردبريس، وتقدر تحدد احتياجك صح، ولو شايف إنك محتاج تتعمق أكتر بخصوص ووردبريس وتعرف عنه معلومات زيادة، يبقى ممكن تطلع على “كورس ووردبريس من الصفر” اللي بساعدك من خلاله تنقل مستواك من مبتدىء لمحترف. 

الخلاصة 

الفرق بين بلوجر ووردبريس كبير لمصلحة ووردبريس، ودا مش بسبب سوء بلوجر نهائي، لكن ووردبريس بيتفوق على باقي برامج الـ CMS كلها بشكل واضح، وبيمتلك أعلى نسبة Market share في السوق كله، وبفرق كبير عن أقرب منافس ليه. 

لكن هيكون أفضل ليك تستخدم بلوجر لو لسه مبتدئ وعاوز تتعلم، أو واخد الموضوع كهواية بس، ومعندكش استعداد تصرف على المدونة، أو كل اللي محتاجه مكان تنشر فيه مقالات بس من وقت للتاني. 

عشان كدا في المقال دا حاولت أبين لك الفرق بين بلوجر ووردبريس بأسهل طريقة ممكنة، واتكلمت معاك عن أشهر الفروق بينهم، عشان تقدر تكون صورة عامة عن الاتنين وتقارن بينهم، وتحدد احتياجك بنفسك، ولو لسه محتار يبقى تواصل معايا بدون تردد. 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Scroll to Top